- ట్రాన్స్ జెండర్ పాత్రలో చైల్డ్ ఆర్టిస్ట్ అద్భుత ప్రదర్శన
 |
(నాటిక పరిషత్కు హాజరైన బాలనటుడు భాను ప్రకాష్) |
పాన్ ఇండియా సినిమాల్లో నటిస్తూ వెండితెరపై మెరుస్తున్న చైల్డ్ ఆర్టిస్ట్ భాను ప్రకాష్, ఇప్పుడు రంగస్థలంపై కూడా తన విశ్వరూపం చూపిస్తున్నాడు. విలక్షణమైన పాత్రలు ఎంచుకుంటూ ప్రేక్షకులను, విమర్శకులను మంత్రముగ్ధులను చేస్తున్నాడు.
'అమ్మ చెక్కిన బొమ్మ'లో అద్భుత అభినయం
శ్రీకాకుళం జిల్లా బొరివంకలో కళింగసీమ కళా పీఠం ఆధ్వర్యంలో అత్యంత వైభవంగా జరుగుతున్న రాష్ట్ర స్థాయి నాటిక పరిషత్ కళాకారుల ప్రతిభకు వేదికగా నిలిచింది. ఈ పోటీల్లో ప్రదర్శించిన 'అమ్మ చెక్కిన బొమ్మ' నాటిక ప్రత్యేక ఆకర్షణగా నిలవగా, ఇందులో భాను ప్రకాష్ పోషించిన ట్రాన్స్ జెండర్ పాత్ర అందరినీ ఆశ్చర్యపరిచింది. ఒక చిన్నారిగా ఉండి అంతటి క్లిష్టమైన పాత్రలో ఒదిగిపోయిన తీరు, డైలాగ్ డెలివరీ, హావభావాలు చూసి సభికులు కరతాళ ధ్వనులతో ప్రాంగణాన్ని హోరెత్తించారు. ఇప్పటి వరకు ఈ నాటిక 43 వేదికలపై ప్రదర్శింపబడింది. అంబేడ్కర్ నాటికలో మంచి పాత్ర పోషించినట్లు భాను ప్రకాష్ తెలిపాడు.
 |
| (ఉత్తమ నటుడు అవార్డు అందుకుంటున్న చైల్డ్ ఆర్టిస్ట్ భాను ప్రకాష్) |
వెండితెరపై బిజీ బిజీ!
చిన్న వయసులోనే అనర్గళంగా డైలాగులు చెప్పడంలో భాను ప్రకాష్ దిట్ట. ఇప్పటివరకు 65కు పైగా సినిమాల్లో నటించి మోస్ట్ డిమాండ్ ఉన్న చైల్డ్ ఆర్టిస్ట్గా టాలీవుడ్లో గుర్తింపు తెచ్చుకున్నాడు.
- పాన్ ఇండియా క్రేజ్ : బ్లాక్ బస్టర్ హిట్ 'కేజీఎఫ్-2', అలాగే 'గమనం' లాంటి భారీ పాన్ ఇండియా చిత్రాల్లో అద్భుతంగా నటించి మెప్పించాడు.
- వరుస క్రేజీ ప్రాజెక్టులు: నాగ చైతన్య - సాయి పల్లవిల 'తండేల్', విజయ్ దేవరకొండ 'కింగ్ డమ్ వంటి ప్రతిష్టాత్మక ప్రాజెక్టుల్లోనూ ఈ చిన్నారి నటుడు కీలక పాత్రలు పోషించాడు. హాలీవుడ్ వెబ్ సిరీస్ స్ట్రేంజర్ థింగ్స్ లో మైకేల్ పాత్రకు డబ్బింగ్ చెప్పి అందరి ప్రశంసలు అందుకోవడం విశేషం.
- రాబోయే చిత్రాలు : అఖిల్ లెనిన్, విజయ్ దేవరకొండ రణబాలి, సత్యదేవ్ మూవీ, మరికొన్ని సినిమాల్లో నటిస్తున్నాడు.
చదువులోనూ.. నటనలోనూ 'ఆల్ రౌండర్'
హైదరాబాద్కు చెందిన భాను ప్రకాష్ ప్రస్తుతం 9వ తరగతి చదువుతున్నాడు. చదువును ఏమాత్రం నిర్లక్ష్యం చేయకుండా అటు విద్యలోనూ, ఇటు వెండితెరపై, అటు నాటక రంగంపై త్రిపాత్ర అభినయం చేస్తూ అందరి మన్ననలు పొందుతున్నాడు.
నటుడు కావాలంటే కేవలం డైలాగులు చెబితే సరిపోదు, ఆ పాత్రలో జీవించాలి అని తన నటనతో నిరూపిస్తున్నాడు భాను ప్రకాష్.
స్టార్ హీరోల సరసన సినిమాల్లో నటిస్తూనే నాటక రంగంపై ఉన్న మక్కువతో అద్భుతమైన ప్రదర్శనలు ఇస్తున్న ఈ బాల కళాకారుడు, భవిష్యత్తులో మరిన్ని ఉన్నత శిఖరాలను అధిరోహించాలని తోటి కళాకారులు, ప్రేక్షకులు కోరుకుంటున్నారు.
ఆల్ ద బెస్ట్..
